Beynəlxalq Olimpiya Komitəsi pandemiyaya görə maddi itkilərlə üzləşən milli olimpiya komitələri və federasiyalara maliyyə yardımı edəcək.
Qurumun prezidenti Tomas Bax İsveçrənin Lozanna şəhərində İcraiyyə Komitəsinin iclasından sonrakı  mətbuat konfransında  bu haqda ətraflı məlumat verib. O, yardım paketinin 800 milyon dollar olduğunu açıqlayıb: “Maddi itkilərin miqdarı olduqca böyükdür. Hamı bilir ki, belə bir şəraitdə maliyyə məsələlərinin müzakirəsi və həlli heç də asan deyil. Amma hər necə olsa da, biz virusun yaratdığı fəsadları bir qədər azaltmaq üçün 800 milyon dollarlıq yardım paketi hazırladıq. Bu məbləğin 650 milyonu Olimpiya oyunlarının təxirə salınmasına görə çətin vəziyyətə düşən təşkilatçılar üçün nəzərdə tutulub. Qalan 150 milyon dollar isə Olimpiya hərəkatına dəstək məqsədilə ayrılıb. Başqa sözlə, bu vəsait Beynəlxalq Olimpiya komitəsilə əməkdaşlıq edən, federasiyalar və millii komitələrə veriləcək. Beləcə qurumlar və idmançılar öz fəaliyyətlərini əvvəlki qaydada davam etdirə biləcəklər”.
Tomas Bax gələn ilə keçirilən Olimpiadanın yüksək səviyyədə təşkil olunacağına inamını da ifadə edib. Xatırladaq ki,  2021-ci ilə təxirə salınan Tokio Yay Olimpiya oyunları iyulun 23-dən başlanmalı, avqustun 8-nə qədər davam etməlidir.