Formula 1 üzrə iyunun 13-də keçirilməli olan Türkiyə Qran-prisi ləğv oluna və ya təxirə salına bilər.
Türkiyədə koronavirusla bağlı vəziyyətin ağır olması Formula 1 rəhbərliyini çətin vəziyyətə salıb. Üstəlik, Böyük Britaniya hökümətinin koronavirusa görə Türkiyəni “qırmızı zona”ya salması vəziyyəti çətinləşdirib. Məsələ ondadır ki, Britaniyaya gələnlər “qırmızı zona” ölkələrindən geri qayıtdıqdan sonra 10 gün ərzində karantində qalmalıdır ki, bu da britaniyalı Formula 1 funksionerlərinin planlarına daxil deyil. Yeni qanunda idmançılara güzəşt nəzərə alınmayıb. Xatırladaq ki, Formula 1 komandalarından 7-inin bazası Böyük Britaniyadadır. Almaniya mətbuatının yazdığına görə, hazırda Formula 1 rəhbərliyi bir neçə variant haqda fikirləşir. Hətta Azərbaycanla Türkiyə Qran-prisinin yerlərinin dəyişdirilməsi də müzakirə olunur. Türkiyə Qran-prisi ümumiyyətlə ləğv edilsə, onun yerinə yarış İtaliyadakı Mucella avtodromunda təşkil edilə bilər. Hətta Almaniyanın Hokkehaym avtodromunun da adı variantlardan biri kimi səslənir. Maraqlıdır ki, Türkiyə Qran-prisi bu mövsüm ləğv olunan Kanadadakı yarışın yerinə təqvimə salınmışdı.
Yaxın vaxtlarda Formula 1 rəhbərliyinin məsələ ilə bağlı qərar qəbul edəcəyi gözlənilir.